Ukrayna ABŞ-yə sülh planını yenidən təqdim edib

Ukrayna ABŞ-yə sülh planının yenilənmiş variantını təqdim edib.

Bu barədə Ukrayna Prezidenti Volodimir Zelenski jurnalistlərin suallarını cavablandırarkən bildirib.

O qeyd edib ki, hazırkı variant Kiyev və Avropanın mövqelərini əks etdirmir, lakin bu son versiya da deyil. Orijinal 28 bəndlik plan 20 bəndə endirilib və redaktə prosesi davam edir. Bu 20 bənd iqtisadiyyat, bərpa və təhlükəsizlik zəmanətləri ilə bağlı əlavə sənədlərin hazırlanması üçün təməl təşkil edir.

Zelenski həmçinin ABŞ-nin Ukraynaya Donbasla bağlı bir sıra təkliflər etdiyini deyib. Belə ki, Ukrayna Silahlı Qüvvələri Donbasdan geri çəkilməli və bölgədə Rusiya qoşunlarının iştirakı olmadan "demilitarizasiya zonası", yaxud "azad iqtisadi zona" yaradılmalıdır.

Bu plana görə, Ukrayna qoşunları ərazinin bu hissəsində, rus qoşunları isə onun kənarında qalacaq. Zelenski bu kontekstdə Kiyevin Donbasla bağlı mövqeyinin dəyişməz olduğunu vurğulayıb.

"Donetsk vilayətində "azad iqtisadi zona" ya gedəcəyikmi sualına Ukrayna xalqı cavab verəcək", – deyə Volodimir Zelenski bildirib.

O, seçkilərlə bağlı da bir sıra mövzulara toxunub.

"Mən hərbi vəziyyətdə seçkilərin keçirilməsini dəstəkləməyə hazıram. Müvafiq siqnal ABŞ-dən gəlib, lakin Kiyev zəiflik göstərməməli və seçkilərin olmaması fonunda manipulyasiya üçün səbəb verməməlidir. Buna görə də şübhəsiz ki, seçkilərin tərəfdarıyam. Ən başlıcası, seçkilərin qanuni keçirilməsidir", – deyə Zelenski fikrini yekunlaşdırıb.