Ukrayna Belqorodu atəşə tutdu: yaralılar var

Mayın 31-nə keçən gecə Rusiyanın Belqorod vilayətinin Şebekino şəhəri Ukrayna tərəfindən intensiv atəşə məruz qalıb. Nəticədə 4 nəfər yaralanıb.

Bu barədə vilayətin qubernatoru Vyaçeslav Qladkov “Telegram” kanalında məlumat paylaşıb. Bildirilib ki, hadisə nəticəsində 8 çoxmənzilli, o cümlədən məktəb və 2 inzibati binanın pəncərələri sınıb.

Hücum nəticəsində həmçinin bir mağaza tamamilə yanıb, 12 avtomobilə isə ciddi ziyan dəyib. V.Qladkov əlavə edib ki, Belqorodda vəziyyət gərgin olduğundan Şebekino və Qrayvoron şəhərlərindən uşaqların təxliyəsinə başlanılıb. Onun sözlərinə görə, mayın 31-i artıq 300 uşaq Voronejə göndərilib.

Rusiya KİV-nin yaydığı məlumata əsasən, Ukrayna diversantları günlərdir Belqorod vilayətini atəşə tuturlar. Rəsmi Kiyev isə bütün ittihamları rədd edir.