Ukrayna bu şəkildə bölünəcək? | Putinin görüşü nəticəsini verdi

"ABŞ Ukrayna münaqişəsinin həlli üzrə Rusiya ilə razılaşmaya dair irəliləyiş əldə edir".

Bu sözləri ABŞ Prezidentinin xüsusi nümayəndəsi Stiven Uitkoff razılaşmanın yaxın zamanda imzalanacağına əmin olub-olmadığı barədə suala cavabında deyib. S.Uitkoffun sözlərinə görə, o, Rusiya Prezidenti Vladimir Putinlə ümumilikdə üç görüş keçirib.

Diplomat qeyd edib ki, hazırda Ukrayna üzrə danışıqlar "hansısa vacib" mərhələdədir.

"Düşünürəm ki, biz qlobal mənada dünya üçün çox vacib olacaq bir şeyin astanasında ola bilərik", ‒ deyə o bildirib.

Həmçinin ABŞ Prezidentinin xüsusi nümayəndəsi qeyd edib ki, Rusiya ilə ABŞ arasında kommersiya tərəfdaşlığı vasitəsilə münasibətləri bərpa etmək imkanı var.

Qərb mətbuatının məlumatına görə, ABŞ Prezidentinin xüsusi nümayəndəsi Stiven Uitkoff Prezident Donald Trampa işğal olunmuş dörd Ukrayna vilayətini Rusiya ərazisi kimi tanımağı təklif edib.

Söhbət Donetsk, Luqansk, Xerson, Zaporojye vilayətlərindən gedir. Lakin bunların heç birini Rusiya tam nəzarətdə saxlamır.

Bunu ukraynalı hərbi-siyasi şərhçi Taras Berezovets ölkəsinin bölünməsi ilə bağlı yayılan xəbərlərə münasibət bildirərkən deyib. Onun sözlərinə görə, bu, ABŞ-də bəzi şəxslərin istəyidir, amma Kiyev razı deyil.