Ukrayna ərazi güzəştləri baxımından mövqeyini özü müəyyən etməlidir | Ceyk Sallivan

“Avropa ölkələri mümkün atəşkəsi qorumaq üçün Ukraynaya qoşun yeridə bilər”.

Bunu Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas deyib.

“Bu günə qədər hansı ölkələrin öz ordusunu Ukraynaya göndərməyə hazır olduğu müzakirə olunurdu, məncə, heç nəyi istisna etmək olmaz”, – deyə diplomat bildirib.

Onun sözlərinə görə, Avropa İttifaqı öz silahlı qüvvələrini bu ölkəyə göndərməklə Ukraynada atəşkəsin qorunmasında iştirak edə bilər.

Bu arada, Ağ Ev Ukraynanın ərazi güzəştlərinin mümkünlüyünə münasibət bildirib.

“Ukrayna Rusiya ilə sülh əldə etmək üçün ərazi güzəştləri baxımından mövqeyini özü müəyyən etməlidir”. Bunu ABŞ Prezidentinin milli təhlükəsizlik üzrə müşaviri Ceyk Sallivan deyib.

“Mənim fikrimcə, əsas məqam ondan ibarətdir ki, Ukrayna özü öz müqəddəratını təyin etməlidir. Həll yolu kənardan, o cümlədən Vaşinqton tərəfindən tətbiq edilməməlidir”, – deyə C.Sallivan bildirib.

O qeyd edib ki, Vaşinqton Kiyevlə fəal qarşılıqlı əlaqədə olur, gələcək danışıqların mümkün formatını müzakirə edir.