Ukrayna ərazilərdən imtina edəcək? | Zelenski hər şeyi danışdı

ABŞ-nin ritorikasının məqsədi indi Kreml diktatoru Vladimir Putini razı salmaq və müəyyən “sülh sazişi”nin bağlanmasını sürətləndirməkdir.

Bu sözləri Ukrayna lideri Volodimir Zelenski ARD telekanalına müsahibəsində deyib.

Zelenski gələcək sülh danışıqları zamanı Rusiyaya ərazi güzəştləri perspektivini şərh edərək, Ukraynanın hüquqi olaraq öz ərazilərindən imtina etməyəcəyini vurğulayıb.

O həmçinin ölkəsinin Rusiya tərəfindən beynəlxalq hüquqa zidd olaraq işğal və ilhaq edilmiş hissələrinin bir gün yenidən milli ərazinin bir hissəsi olacağına əminliyini ifadə edib:

“Əlbəttə, biz hər şeyi qaytaracağıq. Beynəlxalq hüquqa hörmət qayıdacaq. Bu gün deyilsə, sabah”.

ABŞ-nin müdafiə naziri Pit Heqsetin 2014-cü il sərhədlərinə qayıtmağın Ukrayna üçün qeyri-real olduğuna dair sözlərini şərh edən Zelenski deyib ki, Pentaqonun rəhbəri təfərrüata varmalıdır: “Düşünürəm ki, bunun üçün ona vaxt lazımdır”.

“ABŞ bu gün Putinin həqiqətən bəyəndiyi şeylər deyir. Məncə, əsas məsələ budur. Çünki onun xoşuna gəlmək istəyirlər. Bilirsiniz niyə? Bir-biri ilə görüşmək və tez bir zamanda uğur əldə etmək üçün. Atəşkəs uğur deyil”, – deyə dövlət başçısı qeyd edib.

Zelenski həmçinin hesab edir ki, Ukraynanın NATO-ya potensial üzvlük məsələsi müharibəyə son qoymaq üzrə danışıqlar prosesindən kənarda qala bilməz.