Ukrayna kimə möhtac qaldı? - Trampın sülh planı iflasa uğradı?

ABŞ yaxın bir neçə ayda Rusiya-Ukrayna savaşında sülh sazişinə nail ola bilməyəcək.

“Reuters”in məlumatına görə, Donald Tramp Administrasiyasının yüksəkvəzifəli nümayəndələri bu fikirdədirlər. Bu istiqamətdə Kiyev və Moskvaya yeni təzyiq rıçaqları hazırlanır.

Qeyd edək ki, D.Tramp prezidentliyinin ilk dönəmlərində onun Administrasiyası aprel-may aylarında Ukrayna cəbhəsində tam atəşkəsə nail olmaq istəyirdi. Buna görə də vasitəçilik etməyə başladılar. Lakin razılaşmalardan heç biri etibarlı görünmür və 3 illik savaş daha da uzana bilər.

Belə olan təqdirdə isə Ukraynanın Qərb ehtiyacları artır. Çünki hərbi əməliyyatlara şəxsi heyətlə yanaşı, silah-sursat da lazımdır. Halbuki Donald Tramp seçkiqabağı kampaniyasında konflikti yekunlaşdıracağını söz verirdi. Bu vədlər andiçmədən sonra da təkrarlandı.

Danışıqların uzandığı vaxtda isə demək olar ki, hər çıxışında “mən hakimiyyətdə olsaydım, bu savaş başlamazdı” sözləri ilə Co Baydenin özündən sonra qoyduğu “Qordi düyünü”nə diqqət çəkir.

Hər halda onun Vladimir Putinlə ilıq münasibətləri çox adamı sülhə ümidləndirmişdi. Rusiya Prezidenti isə tutduğundan əl çəkmir. Ağ Ev və Dövlət Departamentinin rəsmilərinin sözləri ilə desək, V.Putin Vaşinqtonun sülh cəhdlərinə müqavimət göstərir.

İqtisadi sanksiyalar da onu qorxutmur. Rusiya onsuz da Amerikada Co Baydenin hakimiyyət illərində sanksiyalara qarşı immunitet qazanıb.

D.Trampa gəlincə isə o daha əvvəl sülh mövzusunda Vladimir Putinə güvəndiyini desə də, son vaxtlar Ağ Ev Kremlə qarşı ehtiyatını əldən verməməyə başlayıb. Hətta D.Trampın gömrük rüsumlarının artırılması siyasəti Rusiyanın da başının üzərini ala bilər. Çünki V.Putinin “maksimalist tələbləri” Birləşmiş Ştatlara sərf etmir.

Avropa ilə Ukrayna da bu tələblərlə razılaşmayacaq. Söhbət NATO-nun Avropa, xüsusən də Rusiya ilə sərhəddəki fəaliyyətinin azaldılması, Ukraynaya sülhməramlı göndərilməməsindən gedir. Rusiyanın zəbt olunan ərazilərdən də çıxmaq fikri yoxdur.

Danışıqların uğursuzluğuna örnək kimi isə enerji infrastrukturlarının hədəf alınmaması və Qara dənizdəki atəşkəslə bağlı razılaşmaların pozulmasını göstərmək olar. Bütün bunlara görə ekspertlər yayda da Ukraynanın qaynar nöqtə kimi qalacağını düşünürlər.