Ukrayna Krasnodarda dəniz limanına zərbə endirib

Dekabrın 5-i səhər saatlarında Ukrayna Ordusu dronlardan istifadə etməklə Krasnodar diyarının Temryuk şəhərindəki dəniz limanına zərbə endirib.

Hadisə nəticəsində limanda yanğın baş verib, xəsarətalan yoxdur, heyət təxliyə edilib. Rusiya Müdafiə Nazirliyi bölgə üzərində bir pilotsuz təyyarənin vurulduğunu açıqlayıb.

Rusiyanın ASTRA “Telegram” kanalında verilən məlumatda isə bildirilib ki, bir qaz terminalı yanıb.

Qeyd edilib ki, mayeləşdirilmiş karbohidrogen qazı da daxil olmaqla müxtəlif növ yüklər bu limandan keçir. Bundan əlavə, Samara vilayətinin Sızran şəhərində dronlar neft emalı zavoduna hücum edib.

Bu barədə ASTRA yerli sakinlərə istinadən məlumat verib.

Sızran meri Sergey Volodçenkov şəhərə PUA-ların hücumunu təsdiqləyib, lakin zərbələrin nəticələri barədə məlumat verməyib.

Rusiya Müdafiə Nazirliyindən isə bildirilib ki, Hava Hücumundan Müdafiə qüvvələri gecə ərzində Ukraynaya məxsus 41 PUA-nı məhv edib.

Ukrayna Ordusunun canlı qüvvə itkilərinə gəlincə isə vurğulanıb ki, son bir həftə ərzində Cənub Qüvvələri Qrupunun bölmələri tərəfindən Ukrayna Silahlı Qüvvələrinin 1085-dən çox hərbçisi öldürülüb.

Ukrayna Ordusunun Baş Qərargahından bildirilib ki, dekabrın 5-i gecədən səhərə qədər Rusiya Ordusu 90-ı “Şahed” və digər tipli dronlar olmaqla ümumilikdə 137 PUA ilə hücum edib.

Hava Hücumundan Müdafiə qüvvələri ölkənin şimalında, cənubunda, şərqində və mərkəzində “Şahed”, “Gerber” və digər tipli PUA-ları zərərsizləşdirib. Hava hücumu Ukrayna Müdafiə Qüvvələrinin zenit-raket qoşunları, elektron müharibə bölmələri, pilotsuz sistemlər və mobil atəş qrupları tərəfindən dəf edilib.