Ukrayna paytaxtında dəhşətli mənzərə | Ölənlər və yaralananlar var - Baku TV

İyulun 6-na keçən gecə Rusiya Kiyevə kütləvi raket zərbəsi endirib.

Nəticədə, azı 11 nəfər həlak olub, daha 46 nəfər yaralanıb. Kiyevin müxtəlif rayonlarında 20-yə yaxın ərazidə dağıntılar qeydə alınıb. Dağıntılar altında insanların qalması ehtimalı olduqca yüksəkdir. Ölən və yaralananların sayının dəyişəcəyi istisna edilmir.

Kiyev Şəhər Hərbi Administrasiyasının rəhbəri Timur Tkaçenkonun məlumatına görə, Podol rayonunda yaşayış binası qismən uçub. Darnitsa rayonunda isə bir neçə çoxmərtəbəli bina zədələnib, dağıntılar altında qalan şəxslərin axtarışları davam edir.

Kiyev meri Vitali Kliçko Hava Hücumundan Müdafiə qüvvələrinin hücumu dəf etdiyini bildirib və sakinləri sığınacaqlarda qalmağa çağırıb:

“Yenə də kütləvi zərbə, dronlar, “Şahed”lər, ballistik raketlər. Düşmən şəhərimizi viran qoymaq üçün bütün mövcud vasitələrdən istifadə edir. Ölənlərin olduğunu bilirik, amma əməliyyatlar davam etdiyi üçün hazırda dəqiq sayı deyə bilmərik. Ümid edirik ki, dağıntılar altında heç kim yoxdur, amma məhz bu yerdə cəsədlərin olması ehtimalı yüksəkdir”.

Rusiyanın Kiyevdə həyata keçirdiyi kütləvi hava hücumunda həlak olanların xatirəsinə iyulun 7-si matəm günü elan olunub. Bununla əlaqədar şəhərdə bütün əyləncə tədbirləri ləğv ediləcək. Bundan başqa, bələdiyyə binalarında dövlət bayraqları endiriləcək, dövlət və özəl qurumlarda da bayraqları yarıya qədər endirmək tövsiyə olunub.