Ukrayna Rusiyaya dronlarla hücum etdi | Hava limanları bağlandı

Ukrayna Silahlı Qüvvələri Rusiyanın Volqoqrad vilayətinin Kalaçe-na-Donuda yerləşən neft bazasını vurub. Nəticədə ərazidə güclü yanğın başlayıb.

Frolovo şəhərində də elektrik yarımstansiyası yanıb.

Hadisə ilə bağlı açıqlama verən qubernator Andrey Boçarov qeyd edib ki, sözügedən obyektlərdə yanğın PUA-nın qalıqlarının düşməsi səbəbindən baş verib.

Bundan başqa, Rusiyanın Həşttərxan vilayəti də PUA hücumuna məruz qalıb. Yerli medianın məlumatına görə, ölkənin hava hücumundan müdafiə sistemləri sözügedən vilayətin şimalında beş PUA-nı məhv edib.

Bütün baş verənlərin fonunda Volqoqrad və Həştərxan vilayətlərində hava limanları dron hücumu səbəbindən bağlanıb. Sözügedən aeroportlarda təyyarələrin bütün istiqamətlərə uçuşu və qəbulu müvəqqəti olaraq dayandırılıb.

Həştərxan Hava Limanının nümayəndəsi məlumatı təsdiqləyib və bildirib ki, Bölgədə hava məkanından istifadəyə qoyulan məhdudiyyət səbəbindən uçuş cədvəlində bir sıra dəyişikliklər edilib.