Ukrayna sülhə görə hansı güzəştə gedəcək?

“Bu il Avropa Ukraynaya rekord həcmdə – 27 milyard avro məbləğində hərbi yardım göstərib”.

Bunu Avropa diplomatiyasının rəhbəri Kaya Kallas Xarici İşlər Şurasının iclasının yekunlarına dair mətbuat konfransında bildirib.

Onun sözlərinə görə, Avropa İttifaqı Ukrayna Silahlı Qüvvələrinə 2 milyon artilleriya mərmisi göndərib.

“İndi tempi aşağı salmaq vaxtı deyil. Biz Ukraynanın müdafiəsini və danışıqlardakı mövqelərini gücləndirmək üçün daha çox iş görməliyik. Çünki Rusiya hələ də sülh yolu ilə həll variantını rədd edir”, – deyə Kaya Kallas qeyd edib.

Diplomatın fikrincə, Avropa İttifaqı Ukraynanın gələcək təhlükəsizliyi və müdafiə qabiliyyətinin təmin olunması üçün əlindən gələni edəcək, o cümlədən hərbi təlimlər və müdafiə sənayesinə dəstək göstərəcək.

“Biz bilirik ki, NATO-ya üzvlük konstitusiyada təsbit olunub. Buna görə də əgər onlar güzəştə gedəcəklərsə, əvvəlcə bütün üzv dövlətlər və bütün ölkələr, o cümlədən amerikalılar, onlara yalnız kağız üzərində deyil, real təcrübədə də çox ciddi, hiss olunan təhlükəsizlik zəmanətləri verməlidirlər”, – deyə o əlavə edib.

K.Kallasın sözlərinə görə, sülhə görə hansı güzəştlərə gedəcəyi barədə Ukraynanın özü qərar verməlidir.