Ukraynadakı vəziyyət müzakirə olunacaq

Ukrayna Prezidenti Volodimir Zelenski Böyük Britaniyada səfərdədir.

“Reuters” xəbər verir ki, Ukrayna lideri Böyük Britaniyanın Baş naziri Kir Starmer, Fransa Prezidenti Emmanuel Makron və Almaniya Kansleri Fridrix Mertslə bir sıra görüşlər keçirəcək.

Görüşün məqsədi Ukraynadakı vəziyyət və ABŞ-nin vasitəçiliyi ilə aparılan danışıqları müzakirə etməkdir.

Ukrayna artıq dörd ilə yaxın davam edən müharibənin ən çətin mərhələlərindən birindən keçir. Rusiya qoşunları şərq istiqamətində yavaş-yavaş irəliləyir, Rusiyanın enerji infrastrukturuna və digər obyektlərə zərbələrini intensivləşdirməsi səbəbindən şəhər və qəsəbələr saatlarla qaranlığa qərq olur.

Vaşinqton ötən ay Rusiyanın bir çox tələblərini nəzərə alan atəşkəs planı təklif edib. Bundan sonra Kiyevin Avropa müttəfiqləri şərtlərin yaxşılaşdırılması istiqamətində Ukraynanı dəstəkləyiblər.

Zelenski daha sonra Starmer ilə ikitərəfli görüş keçirəcək və Finlandiya, İtaliya, NATO və Avropa İttifaqı liderləri ilə birgə telefon danışığına qatılacaq.

Londondan sonra Ukrayna lideri Belçikaya gedəcək və orada NATO-nun Baş katibi Mark Rutte və Avropa Komissiyasının sədri Ursula Fon der Lyayenlə danışıqlar aparacaq.