Ukraynadan dəhşətə gətirən görüntülər | Rusiya ağır itki verdi

Oktyabrın 21-dən 22-nə keçən gecə Rusiya Ordusu paytaxt Kiyev də daxil olmaqla, Ukraynanın bir neçə ərazisini kütləvi dron hücumuna məruz qoyub.

Hücum nəticəsində Kiyevdə 4 nəfər həlak olub, uşaq da daxil olmaqla, 5 nəfər ciddi xəsarət alıb.

Bu barədə şəhərin meri Vitali Kliçko məlumat verib. Bildirilib ki, Rusiyanın hava hücumları səbəbi ilə 8 və 9 mərtəbəli yaşayış binalarında yanğınlar baş verib.

PUA qalıqlarının düşməsi səbəbi ilə 10 mərtəbəli yaşayış binasında da yanğın baş verib, tibb müəssisəsinə ziyan dəyib. Hücum səbəbi ilə rayonlardan birində 3 mərtəbəli yaşayış binasında yanğın baş verib. Hadisə yerinə dərhal xilasedicilər və yanğınsöndürənlər cəlb edilib.

Gecə və səhər saatlarında Rusiya Ordusu Ukraynanın enerji infrastrukturuna hücum edib. Energetika naziri Svetlana Qrinçuk açıqlamasında vurğulayıb ki, bütün gecə Rusiya Ukraynanın enerji infrastrukturuna hücum edib. Kütləvi hücumlar səhər də davam edib.

Hava hücumundan müdafiə qüvvələrindən bildirilib ki, bütün ölkə ərazisində raket hücumu xəbərdarlığı da elan edilib. Bununla yanaşı, kamikadze dronları ilə Zaporojye də atəşə tutulub. Hadisə nəticəsində 13 nəfər xəsarət alıb.

Ukrayna Silahlı Qüvvələrinin Baş Qərargahından isə bildirilib ki, son sutka ərzində Rusiyanın 1050 hərbçisi zərərsizləşdirilib. Bununla yanaşı, 11 döyüş maşını, 12 artilleriya sistemi və 2 tank sıradan çıxarılıb. Hava hücumundan müdafiə qüvvələrindən bildirilib ki, 160 pilotsuz uçuş aparatı da vurulub.

Rusiya Müdafiə Nazirliyindən isə bildirilib ki, gecə ərzində Ukraynanın 33 PUA-sı məhv edilib.