Ukraynadan Rusiya Ordusuna sarsıdıcı zərbə

Ukrayna silahlı qüvvələri avqustun 14-ü gecə saatlarında Rusiyanın Volqoqrad şəhərində “Lukoyl” şirkətinə məxsus neft emalı zavoduna dronlarla hücum edib.

Bu barədə Ukrayna hərbi qərargahı məlumat yayıb.

Bildirilib ki, əsas məqsəd Rusiya ordusu üçün yanacaq istehsal edən zavodu məhv etmək olub. Zərbələrdən sonra obyektin ərazisində partlayış və yanğınlar baş verib, neft məhsulları əraziyə axıb.

Məlumatda bildirilib ki, zavodun ərazisində yanğınlar günorta saatlarına qədər davam edib.

Volqoqrad vilayətinin qubernatoru Andrey Boçarov məlumatı təsdiqləyərək vurğulayıb ki, kütləvi hücumla bağlı olaraq vilayətin hava limanının fəaliyyəti müvəqqəti olaraq dayandırılıb. Ukrayna silahlı qüvvələri artıq ikinci sutkadır ki, hücumlarını davam etdirir.

Məlumat üçün bildirək ki, neft emalı zavodu bundan öncə də 31 yanvar və 3 fevral tarixlərində hücuma məruz qalıb. Bu səbəbdən müəssisə bir müddətlik fəaliyyətini dayandırmışdı.

Rostov vilayətinin qubernatoru vəzifəsini müvəqqəti icra edən Yuri Slyusar isə “Telegram” kanalında bildirib ki, Ukrayna Rostov-na-Donu şəhərinə də pilotsuz uçuş aparatları ilə hücum edib. Hadisə nəticəsində 13 nəfər xəsarət alıb.

“Həkimlər bildirilər ki, yaralılardan ikisinin vəziyyəti ağırdır. Daha 11 yaralı xəstəxanada müalicə alır. Xəsarət alanlarla bağlı məlumat dəqiqləşdiriləcək”, – deyə o qeyd edib. Slyusarın sözlərinə görə, Rostova PUA hücumundan sonra bir neçə çoxmənzilli ev zədələnib.