Ukraynanın “B” planı | Zelenskinin hərbi müşavirindən “Baku TV”yə özəl açıqlamalar

“Ukraynada hərbi yardımsız qalmaq riskləri nəzərdən keçirilir. İstənilən halda bizim “B” planımız var”.

Bu sözləri Ukrayna Prezident Ofisinin rəhbərinin müavini Pavlo Palisa “Baku TV”yə müsahibəsində deyib.

P.Palisa Rusiyanın Ukraynaya qarşı döyüşlərdə “miqrant ordusu”ndan istifadə etməsindən də danışıb.

“Rusiya tərəfdən döyüşlərdə Asiya, Afrika, Latın Amerikası dövlətlərindən olan vətəndaşların iştirak etdiyi hallarla qarşılaşırıq. Onların arasında əsir düşənlər də çox olub. Rusiyadakı miqrantlar ən müdafiəsiz insanlardır. Buna görə də onlara inzibati təzyiq asanlaşır. Cinayət işlərinin saxtalaşdırılması ilə bəzi miqrantlar həbsxana ilə cəbhəyə yollanmaq arasında seçim etməli olurlar”, ‒ o qeyd edib.

P.Palisa Rusiya Ordusunun itkiləri barədə də məlumat verib.

“Rusiyanın itkiləri bir milyonu keçib. Ukraynanın itkiləri onlarla müqayisə edilə bilməz. Şübhəsiz ki, hər bir əsgərin həyatı dəyərlidir. Hər bir əsgərin ölümü kiminsə dağılmış dünyasıdır. İndi silahla dövləti qoruyan insanlar orada yaşamağa ən çox layiq olanlardır. Münaqişənin dördüncü ili gedir, Rusiya böyük itkilər bahasına olsa da, irəli getməyə çalışır. Onlar Kursk vilayətində böyük itki veriblər. Rusiyanın Baxmut və Pokrovskda itkiləri çoxdur. Zaporojye uğrunda döyüşlər də onlara baha başa gəlib”, ‒ deyə o əlavə edib.