Ukraynanın enerji sistemi vuruldu, insanlar işıqsız qaldı

“Rusiya ABŞ-nin təklif etdiyi şərtləri pozur”.

Bunu Ukrayna Prezidenti Volodimir Zelenski Kiyevdə NATO-nun Baş katibi Mark Rutte ilə birgə mətbuat konfransında bildirib.

O qeyd edib ki, bir həftəlik enerji infrastrukturuna qarşı atəşkəsi Rusiya cəmi bir gün sonra pozdu. Bu, Kremlin baş verən hər bir məsələyə real münasibətidir.

“Hamı hava şəraitini görür. Qışın ən çətin günləridir. İlk növbədə enerji infrastrukturuna zərbələr vurulur ki, insanları elektrik enerjisi imkanından məhrum etsinlər, məhvə sürükləsinlər. Ukrayna bu məsələ ilə bağlı ABŞ ilə əlaqə saxlayır. Ümidvaram ki, tərəfdaşlar bu dəfə kənarda qalmayacaq və bundan sonra ölkənin və onun vətəndaşlarının müdafiəsi üçün vacib dəstəyi göstərəcəklər”, – Zelenski vurğulayıb.

NATO-nun Baş katibi Mark Ruttenin sözlərinə görə, müttəfiqlər Ukraynanın silah ehtiyacını tam olaraq ödəyəcəklər:

“Hazırda müttəfiqlərin üçdə ikisi PURL proqramında iştirak edir. Lakin həqiqətən maliyyə yükünün bölüşdürülməsi problemi var. Amma bu, həll olacaq. Ukraynanın ABŞ-də silah alınması üçün istifadə olunan PURL proqramının maliyyələşdirilməsinə tələb olunan 15,5 milyard dollar mütləq təmin ediləcək”.

Qeyd edək ki, Rusiya ilin əvvəlindən bəri Ukraynanın enerji sisteminə ən güclü zərbəni endirib. Nəticədə Ukraynanın çox sayda enerji istehsalı və paylanması obyektləri zərər görüb, ölkə üzrə enerji sistemi ciddi məhdudiyyətlərlə işləyir. Onminlərlə insan işıqsız qalıb.