Ukraynanın Mila kəndinə dəhşətli hücum | Ölən və itkin düşənlər var - Baku TV

Ukraynada Kiyev vilayətinin Buça rayonunun Mila kəndi son üç gündə Rusiya Ordusunun ardıcıl dron hücumları nəticəsində xarabalığa çevrilib.

Son üç gündə Kiyev vilayətinə demək olar ki, hər saat dron hücumları həyata keçirilib. Hücumların iki günü məhz bu kəndə düşüb.

Kənddə Kiyev vilayətinin satış obyektlərinin içməli su ilə təmin edilməsində əsas rol oynayan iki zavoddan biri yerləşir. Həmin su zavoduna da zərbə endirilib. Hücum nəticəsində kənd ciddi zərər görüb.

Mila kəndində yaşayış evlərinin təxminən 70-80 faizi tamamilə dağılıb. Hazırda kənd tüstü içərisindədir. Axtarış-xilasetmə işləri davam edir. Bu səbəbdən kəndin bəzi ərazilərinə jurnalistlərin, xilasedicilərin və digər şəxslərin girişinə icazə verilmir. Ərazidə partlayıcı maddələrin aşkarlanması ehtimalı da yüksəkdir.

Təkcə Buça rayonunda son üç gündə ölənlərin sayı 32 nəfərə çatıb, 50 nəfər yaralanıb. Ölənlərin sayının artacağı ehtimal olunur. Çünki yaralılar arasında vəziyyəti ağır olan şəxslər, o cümlədən azyaşlı uşaqların olduğu bildirilir.