Ukraynaya bu raket və qırıcı təyyarələr veriləcək

“Qarşıdan gələn qış üçün xeyli miqdarda qaz idxal etməyə ehtiyacımız var, çünki Rusiya istehsalımıza zərbələr endirir”.

Bunu Ukrayna Prezidenti Volodimir Zelenski "Könüllülər Koalisiyası"nın iclasında deyib.

O, müttəfiqlərini qarşıdan gələn qış mövsümü üçün lazımi miqdarda qaz idxalını maliyyələşdirməyə kömək etməyə çağırıb.

Zelenski həmçinin qeyd edib ki, Rusiya tərəfi ilə istənilən formatda görüşməyə hazırdır, lakin ərazi bütövlüyü məsələsi gələcəkdə müharibədə hər hansı bir təcavüzü təşviq etməməlidir.

“Rusiyaya bu müharibəni hamımız üçün ədalətsiz olacaq hər hansı bir nəticə ilə başa vura biləcəyini düşünmək üçün heç bir səbəb verməyin. Müharibəyə son qoymaq üçün yalnız güclü və ədalətli həll yolu həqiqətən təsirli olacaq”, ‒ Ukrayna lideri bildirib.

“Ukraynanı dəstəkləmək və Rusiyaya təzyiqi saxlamaq üçün səylərimizi davam etdirmək çox vacibdir”. Belə bir açıqlamayla isə Fransa Prezidenti Emmanuel Makron çıxış edib.

“Ukraynaya əlavə maliyyə dəstəyinin göstərilməsi üçün səylərimizi artıracağıq. Bundan əlavə, yaxın günlərdə "Aster" raketləri tədarük edəcək, yeni təlim proqramları həyata keçirəcək və əlavə "Mirage" təyyarələri göndərəcəyik. Fransa həmçinin koalisiya üzvləri ilə birlikdə əlavə təşəbbüslər də elan edəcək”, ‒ Makron vurğulayıb.

İtaliya isə Ukrayna üçün SAMP/T hava hücumundan müdafiə sistemlərinə sursat və raketlərin tədarükünü özündə ehtiva edən 12-ci hərbi yardım paketini hazırlayır. Silah-sursatların Ukraynaya ilin sonunadək təhvil vərilməsi planlaşdırılır.