Ukraynaya dəhşətli hücum | Azərbaycanlıların yaşadığı məhəllə vuruldu - Baku TV

Ukraynanın paytaxtı Kiyevə davam edən silsilə dron hücumları nəticəsində azərbaycanlıların toplaşdığı məkanlardan biri dağılıb.

Söhbət Kiyevin sol sahilində yerləşən “Dubrovka” restoranından gedir. Bura 1993-cü ildə Ağdamın işğalı zamanı ailəsi ilə birlikdə qaçqın düşən, daha sonra Ukraynaya köçən Natiq Quliyevə məxsusdur. Restoran uzun illərdir Kiyevdə yaşayan azərbaycanlıların tez-tez bir araya gəldiyi məkanlardan biri olub.

Hadisə zamanı burada heç kimin olmaması daha böyük itkilərin qarşısını alıb.

Restoran sahibi Natiq Quliyev bildirib ki, hücum zamanı yaxınlıqdakı zalda azərbaycanlılar ad günü mərasimi keçirirmiş:

“Keçən gecə restoranı yığışdırırdıq, bağlamağa hazırlaşırdıq. Bu zaman dron hücumuna məruz qaldıq. Xoşbəxtlikdən heç kim yox idi. Düzdür, yaxınlıqda oturanlar vardı, bizim azərbaycanlılar ad günü qeyd edirdilər. Dron düşdü, buranı dağıtdı, bu günə qoydu. Dağıntı nəticəsində qonşu zalda da yanğın baş verdi. Yanğının söndürülməsi üçün müraciət etdik. Tam söndürə bilmədilər. Yuxarı mərtəbələrdə yanğın oldu, müdaxilə etdilər, alovun tamamilə yayılmasına imkan vermədilər”.