Ukraynaya güclü raket zərbəsi | Azərbaycanlılara məxsus obyektlər zərər gördü

Noyabrın 17-də Ukraynaya rekord hava hücumu qeyd alınıb.

Gecə və səhər saatlarında 145 hava hədəfi vurulub. Müxtəlif vilayətlərdə 20 ev dağılıb. 10 nəfər həlak olub, yaralananların sayı 30 nəfərə çatıb.

Ukraynanın Avropa İttifaqı ilə sərhədi, o cümlədən Kiyev raket zərbələrinə məruz qalıb. Kiyevdə azərbaycanlılara məxsus iaşə və ticarət obyektləri də ciddi zərər görüb.

Kiyev Hərbi Administrasiyasının rəsmisi Mixail Şamanovun sözlərinə görə, Rusiya Silahlı Qüvvələri son 3 ayın ən irimiqyaslı hava zərbələrini həyata keçirib. Bu dəfə əsas hədəflərdən biri paytaxt Kiyev idi.

“Hücum zamanı dronlardan başqa, qanadlı raketlər, “Khinjal” və “İskəndər” tipli raketlərdən istifadə olunub. Kiyev üzərində 5 saat bu hücum davam edib, hava həyəcan siqnalları elan edilib. Zərbələrin demək olar ki, hamısı havada zərərsizləşdirilib. Qalıqlardan biri paytaxtın Peçersk rayonunda beşmərtəbəli çoxmənzilli bir evin üstünə zərər verib, bir qadın yaralanıb”, – o bildirib.

Qeyd edək ki, noyabrın 17-si axşama doğru yenidən bütün Ukrayna üzrə hava həyəcan siqnalları verilib.