Ukraynaya kütləvi raket hücumu edilib

Rusiya Silahlı Qüvvələri iyunun 20-nə keçən gecə Ukraynaya qarşı genişmiqyaslı hava hücumu həyata keçirib.

Məlumata görə, hava hücumundan müdafiə sistemləri Rusiyanın atdığı 30 “Şahed” pilotsuz uçuş aparatından 28-ni vurub.

Kiyev Hərbi Administrasiyasının rəhbəri Sergey Popko "Telegram" kanalında qeyd edib ki, təkcə paytaxt ətrafındakı hava məkanında Rusiyanın 20-yə yaxın hədəfi müəyyən olunaraq məhv edilib.

Ölkənin müdafiə nazirinin müavini Qanna Malyar isə bildirib ki, düşmən öz mövqelərini asanlıqla əldən verməyəcək və Ukrayna daha çətin günlərə hazır olmalıdır. Onun sözlərinə görə, ən böyük zərbə hələ qarşıdadır.

Qeyd edək ki, Ukrayna Prezidenti Volodimir Zelenski ordunun bəzi istiqamətlərdə irəlilədiyini, bəzilərində isə intensiv hücumlardan müdafiə olunduğunu bildirib. O əlavə edib ki, yekun nəticə Ukrayna üçün əlverişli olub.