Ukraynaya silahlar nə vaxt göndəriləcək? | Zelenskidən ABŞ-yə təşəkkür

ABŞ Senatı Ukrayna, İsrail və Tayvana ayrılan yardım paketini təsdiqləyib.

Yerli medianın xəbərinə görə, qanun layihəsinin lehinə 79, əleyhinə 18 səs verilib.

Beləliklə də, İsrailə 26,4, Ukraynaya 60,8, Tayvana isə 8 milyard dollar məbləğində yardım ayrılacaq. Qanun layihəsi ölkə Prezidenti Cozef Bayden tərəfindən 24 aprel tarixində imzalanacaq.

Ağ Evin rəsmi saytında dərc olunan açıqlamada bildirilib ki, aprelin son həftəsində Ukraynaya silah və texnikanın göndərilməsi prosesinə start veriləcək.

Yeri gəlmişkən, Ukrayna Prezidenti Volodimir Zelenski də ABŞ hökumətinə Ukraynaya həyati yardımı təsdiq etdiklərinə görə minnətdarlığını ifadə edib.

"Bu səsvermə Amerikanın demokratiya çırağı və azad dünyanın lideri rolunu gücləndirir", – deyə lider öz “Telegram” hesabında yazıb.

Məlumat üçün bildirək ki, sözügedən layihə aprelin 20-də ABŞ Konqresinin Nümayəndələr Palatasında, aprelin 23-də isə Senatda dəstəklənib. Yardım paketinin həcmi isə 95 milyard dollardır.