Ukraynaya yox, bu ölkəyə qaçırdılar | Putinin ətrafı Ukraynaya inandı

Rusiya Prezidenti Vladimir Putinə yaxın olan şəxslər Ukraynanın “Crocus”da baş verən terror aktı ilə əlaqəsinin olmadığını düşünürlər.

Belə bir iddia ilə “Bloomberg” nəşri çıxış edib.

Məlumata görə, Kremldə hamı Federal Təhlükəsizlik Xidmətinin uğursuzluğuna heyrət edib. Nəşrin iddiasına görə, ölkə rəhbərinin də iştirakı ilə keçirilən qapalı iclas zamanı bir sıra dövlət rəsmiləri Ukraynanın sözügedən terror aktında əli olmadığı qənaətinə gəliblər. Ancaq Vladimir Putin bu məsələdə rəsmi Kiyevin əlinin olmasında israr edib.

Qeyd olunub ki, Kreml rəhbəri bu yolla Rusiya vətəndaşlarını Ukrayna ilə müharibə fonunda dövlətin ətrafında sıx birləşdirmək niyyətindədir.

Məlumat üçün bildirək ki, Moskva vilayətində baş verən terror aktından sonra Rusiya tərəfi təkidlə sözügedən məsələdə Ukraynanı günahlandırıb. Lakin rəsmi Kiyev açıqlaması zamanı V.Putinin iddialarını qətiyyətlə rədd edib. Ağ Ev isə terror aktının İŞİD terror təşkilatı tərəfindən törədilməsi fikrini irəli sürüb.

Yeri gəlmişkən, “Crocus”la bağlı daha bir məqamın üstü açılıb. Belə ki, Belarus Prezidenti Aleksandr Lukaşenko terror törətməkdə ittiham olunan şəxslərin əvvəlcə Belarus istiqamətində irəliləməyə cəhd göstərdiklərini bildirib. Qeyd edib ki, onlar sərhəddən keçməyin mümkün olmadığını anlayandan sonra Ukraynaya doğru üz tutublar.