Vardanyan Ukrayna tərəfindən beynəlxalq axtarışa verildi

Moskvanın xüsusi missiya ilə Rusiya sülhməramlılarının nəzarətində olan Azərbaycan ərazilərinə göndərdiyi erməni əsilli milyarder Ruben Vardanyan Ukrayna tərəfindən axtarışa verilib.

Məlumata görə, onun adı Kiyevin sanksiyalar bazasına daxil edilib. R.Vardanyan dərhal saxlanılaraq Ukrayna və NATO ölkələrinin hüquq-mühafizə orqanlarına təhvil verilməli şəxs kimi siyahıda yer alıb.

Bildirilir ki, R.Vardanyan Ukraynaya qarşı təcavüzə şərikdir. Rusiya Ukrayna və Qarabağda hərbi mövcudluğunu genişləndirmək üçün onun şirkətlərindən uğurla istifadə edib. Bundan başqa, R.Vardanyan Xəzər regionunda Kremlin ruporudur. Qarabağ bölgəsində daim münaqişənin qızışdırılması ilə birbaşa əlaqəli olan da məhz odur.

R.Vardanyan həmçinin ofşor şirkətlər vasitəsilə çirkli pulların yuyulmasında və Vladimir Putinin nüfuzlu yaxınlarına pul köçürməkdə ittiham olunur. Qeyd edilir ki, onun Ukraynanın müntəzəm atəşə tutulmasında Moskvanı dəstəkləyən Tehranla da əlaqələri var.