Xamenei 12 günlük müharibədən danışdı

"ABŞ ən yeni və müasir silahlardan istifadə etməsinə baxmayaraq, İrana qarşı 12 günlük müharibədə uğur qazana bilməyib".

Bunu İranın Ali Rəhbəri Əli Xamenei bildirib.

Onun sözlərinə görə, İran xarici müdaxiləyə qarşı güclü müqavimət cəbhəsi yaradıb və bunu qorumaq vacibdir:

"Bizim kimi bir ölkə hamıdan daha çox səfərbərliyə ehtiyac duyur. Dünyada çoxlu düşmənçilik, tamahkarlıq, hakimiyyətlərin müdaxiləsi var və bütün bu zülmlərə, həddindən artıq hərəkətlərə qarşı müqavimət elementi mövcud olmalıdır".

İranın daxilində və regionda baş verən son hadisələrə toxunan Xamenei qeyd edib ki, 12 günlük müharibədə İran xalqı, şübhəsiz ki, həm Amerikaya, həm də İsrailə qalib gəldi:

"Onlar heç nə əldə etmədən geri döndülər, yəni məqsədlərinin heç birinə nail ola bilmədilər. Bəli, biz itkilər verdik, bunda heç bir şübhə yoxdur, müharibənin təbiəti belədir. Amma düşmənə vurulan maddi zərər ölkəmizə dəyən zərərdən qat-qat çox oldu".

Qəzza zolağındakı müharibəyə toxunan Xamenei qeyd edib ki, bu Vaşinqtonu beynəlxalq arenada indiyə qədər görünməmiş dərəcədə təcrid vəziyyətinə salıb.