Xəzər dənizində gərgin anlar: Ölən və yaralananlar var - Baku TV

İranın Xəzər dənizindəki ticarət gəmisinə Ukrayna Silahlı Qüvvələri tərəfindən hücum edilib, bir nəfər ölüb, daha iki nəfər yaralanıb.

Bu barədə İran Xarici İşlər Nazirliyinin bəyanatında bildirilib.

“Tehran Ukraynanın gəmiyə endirdiyi zərbəni qətiyyətlə pisləyir və milli maraqlarını və təhlükəsizliyini qorumaq üçün beynəlxalq hüququn əsas prinsipləri və normalarına uyğun olaraq cavab tədbirləri görmək hüququnu özündə saxlayır”, – deyə qurum qeyd edib.

Bu arada Palau bayrağı altında üzən mülki gəmi Ukraynanın Odessa vilayətinin limanından çıxarkən Rusiya qoşunları tərəfindən iki dəfə hücuma məruz qalıb.

Bu barədə Ukraynanın infrastruktur və nəqliyyat naziri Nikolay Kalaşnik “Telegram” kanalında məlumat verib.

“Gəmiyə dəyən zərbələr nəticəsində yanğın baş verib. İlkin məlumata görə, ekipajın yeddi üzvünü və ukraynalı pilotu xilas etmək mümkün olub. İki dənizçi hazırda itkin düşmüş hesab olunur. Axtarış-xilasetmə əməliyyatı davam edir”, – deyə o yazıb.

Kalaşnik bu hücumu mülki infrastruktura və beynəlxalq gəmiçiliyə qarşı qəsdən endirilmiş zərbə adlandırıb.

“Rusiya beynəlxalq hüquq normalarına tam etinasızlıq nümayiş etdirməyə davam edir, gəmiçiliyin təhlükəsizliyi, dünya ticarəti və ərzaq təhlükəsizliyi üçün təhlükə yaradır”, – deyə nazir vurğulayıb.