Yadplanetli izi, yoxsa...? | Hamını mat qoyan məsələnin üstü açıldı

1976-cı ildə Marsın səthini araşdırarkən çəkilən fotoşəkillər insan və ya meymun üzünə bənzəyən nəhəng quruluşu göstərir. Bəs o vaxtdan bəri “Marsdakı üz” kimi tanınan bu struktur tam olaraq nə və ya nəyi ifadə edir?

İnsan üzünə bənzəyən bu formasiya Qırmızı Planetin Sidoniya kimi tanınan bölgəsində çəkilib. Alimlərin fikrincə, Marsdakı məşhur sima əslində işığın yaratdığı kölgə oyunudur. Günəşin işıqlandırma bucağı təbəqənin səthindəki çıxıntılardan kölgələr yaratmaq üçün tam uyğundur və foto da məhz o zaman çəkilib.

Çoxları bu üzü Marsda bir vaxtlar həyatın mövcudluğunun və planetdə nəhəng sənət əsərlərinin tikildiyinin sübutu kimi görür. Amma 2007-ci ildə Marsa daha yüksək ayırdetmə qabiliyyətinə malik kosmik gəmi göndərilib və bu quruluşun təbii formasiya olduğunu və insan üzünə çox da bənzəmədiyini göstərən fotoşəkillər lentə alınıb.

Tənqidçilər hələ də bölgədəki bu üzün və piramida formalarının təbii ola biləcəyinə inanmır və bəlkə də milyonlarla il əvvəl bu bölgədə inkişaf etmiş bir sivilizasiyanın yaşadığını düşünürlər.

Onlar NASA-nın iddialarının əksini söyləyirlər və agentliyin göstərdiyi fotoşəkilləri bəşəriyyəti aldatmaq üçün hazırlanmış sənədlər kimi qiymətləndirirlər.