Yaxın Şərqdə gərginlik: Qəzzada növbəti əməliyyat planı

İsrail Ordusu noyabrın 19-da Qəzza zolağında HƏMAS-ın 3 komandirini məhv edib.

Bu barədə İsrail Müdafiə Qüvvələrinin mətbuat xidməti məlumat yayıb.

Qeyd olunub ki, hər 3 rəhbər şəxs eyni əməliyyat çərçivəsində öldürülüb. Komandirlərin adları hələ ki, açıqlanmayıb. İsrail Ordusu isə noyabrın 19-da Qəzzada 2 hərbçisini itirib.

“The Times of Israel” nəşrinin xəbərinə görə, onlar İsrail Ordusunun paraşüt-desant briqadasının əsgərləri olublar. SAXAL-ın daha bir əsgəri noyabrın 20-də Qəzza zolağında keçirilən quru əməliyyatlar zamanı həlak olub. Bununla İsrail Ordusunun ölən hərbçilərinin sayı 66 nəfərə çatıb.

Bu arada, İsrail Müdafiə Ordusunun Baş Qərargah rəisi Qəzza zolağında növbəti hərbi əməliyyatların planını təsdiqləyib. Bu barədə SAXAL-ın sözçüsü bildirib.

Mətbuat katibi planın Qəzza zolağının şimalında əməliyyatların başa çatmasından sonra həyata keçiriləcək mərhələ olduğunu deyib. Onun sözlərinə görə, müharibənin ümumi hədəfi dəyişməz olaraq qalır:

“Biz HƏMAS-ın bütün hərbi infrastrukturunu yararsız hala salıb, liderlərini zərərsizləşdirməklə İsrail dövlətinin təhlükəsizliyini təmin edəcəyik. Onlar ya təslim olacaqlar, ya da tunellərində öləcəklər”, – deyə mətbuat katibi qeyd edib.

O bildirib ki, hadisələri qabaqlamayacaq, nə vaxt, harada və nə etməyi planlaşdırdıqlarını söyləməyəcək.