Yəmənin şərqindəki hava limanı vuruldu | Seperatçı qüvvələr Əl-Həşadan çıxarılıb - Baku TV

Səudiyyə Ərəbistanının Hərbi Hava Qüvvələri Yəmənin şərqindəki Seyun şəhərinin hava limanına aviazərbələr endirib.

Bu barədə "Sky News Arabia" məlumat yayıb.

Qeyd olunur ki, Yəmənin informasiya, mədəniyyət və turizm nazirinin müavini Salah əl-Akel hava limanına zərbələri təsdiqləyib.

Bildirilib ki, Səudiyyə Ərəbistanına məxsus təyyarələr hava limanına azı üç zərbə endirib və şəhərdə güclü partlayışlar eşidilib.

Daha əvvəl şərqi Hədraməvtin qubernatoru Cənubi Keçid Şurasının nəzarəti altında olan hərbi düşərgələri hökumət qüvvələrinə təhvil vermək üçün əməliyyatın başladığını elan edib. O, "Vətən qalxanı" bölmələrinin əyalətin qərbindəki Əl-Həşa rayonundakı əsas dayaq nöqtəsi olan 37-ci briqadanın düşərgəsini geri aldığını, separatçı qüvvələri oradan çıxardığını və Seyun şəhərinə doğru irəliləməyə başladığını bildirib.

Əlavə edək ki, Birləşmiş Ərəb Əmirlikləri Yəməndən sonuncu qoşunlarının çıxarılmasını təsdiqləyib və ölkənin cənubundakı separatçılara hava zərbələri endirən Səudiyyə Ərəbistanının rəhbərlik etdiyi koalisiyanı gərginliyi azaltmağa çağırıb.