Yəmənli alpinist vulkan kraterinə düşərək həlak oldu - Baku TV

Təhlükəli, sığortasız dırmanışları ilə tanınan yəmənli alpinist Əntar əl-Absi Damt vulkanının qaynar kraterinə düşərək həyatını itirib.

Bu barədə “Yemen Online” nəşri Yəmənin Mülki Müdafiə Xidmətinə istinadən məlumat yayıb.

Hadisə çoxsaylı tamaşaçıların gözü qarşısında baş verib. Məlumata görə, insanlar alpinistin dırmanışını videoya çəkərkən o, qəfil vulkan kraterinə düşüb.

“Hörümçək adam” ləqəbi ilə tanınan Əntar əl-Absi təhlükəli yüksəlişləri sığorta avadanlığı və xüsusi qoruyucu vasitələr olmadan həyata keçirməsi ilə məşhur idi.

Bildirilir ki, o bu dəfə də vulkana ayaqqabısız və avadanlıqsız qalxmağa çalışıb. Hadisədən dərhal sonra axtarış-xilasetmə əməliyyatı başlanılıb. Xilasedicilər onun cəsədini sönmüş vulkanın daxilində yerləşən isti kükürdlü sularda aşkarlayıblar.

Hadisənin başvermə səbəbləri ilə bağlı araşdırma aparılır.