“Yeni ilədək bir çox şey həllini tapa bilər” | Volodimir Zelenski

Ukrayna Prezidenti Volodimir Zelenski dekabrın 28-də amerikalı həmkarı Donald Trampla görüşü zamanı təhlükəsizlik zəmanətlərini, həmçinin ərazilərə və Zaporojye Atom Elektrik Stansiyasına dair həssas məsələləri müzakirə etməyi planlaşdırır.

Onun sözlərinə görə, Trampın Mar-a-Laqo iqamətgahında keçirilməsi planlaşdırılan görüşdə geniş gündəlik nəzərdə tutulub.

“Böyük gündəliyimiz var, düşünürəm ki, bu həftə sonunda Floridada Prezident Trampla görüşümüz olacaq. Biz məhz bu sənədləri, təhlükəsizlik zəmanətlərini müzakirə edəcəyik. Yeni ilədək bir çox şey həllini tapa bilər”, – deyə o qeyd edib.

Komandaların səmərəli çalışdığını və sənədlərin ilkin layihələrinin hazırlandığını vurğulayan Ukrayna lideri eyni zamanda bəzi məsələlərin yalnız liderlər səviyyəsində müzakirə oluna biləcəyini diqqətə çatdırıb. Onların sırasında təhlükəsizlik zəmanətləri xüsusi yer tutur.

“Açığı, üzərində işlədiyimiz 20 maddəlik plan 90 faiz hazırdır. Məqsədimiz onu 100 faizə çatdırmaqdır. Bu, asan deyil və heç kim demir ki, hər şey dərhal 100 faiz olacaq”, – deyə Prezident bildirib.

Zelenski sonda əlavə edib ki, hər bir görüş və danışıq arzuolunan nəticəni yaxınlaşdırmalıdır.