Yüzlərlə sakin Yeni Kaledoniyadan çıxarıldı | Nə baş verir?

Yeni Zelandiya Hərbi Hava Qüvvələrinə məxsus təyyarələr Yeni Kaledoniyadan 300-dən çox insanı təxliyə edib.

Bu barədə Yeni Zelandiyanın xarici işlər naziri Uinston Peters məlumat verib.

Bildirib ki, sərnişinlər arasında əcnəbilər də var.

Onun sözlərinə görə, həyata keçirilən yeddi reyslə Numea şəhərindən Oklendə 225 Yeni Zelandiya vətəndaşı və 145 əcnəbi daşınıb:

“Fransa və Yeni Kaledoniya hakimiyyət orqanları icazə verən kimi biz vətəndaşlarımız və kömək istəyən xarici vətəndaşlar üçün evakuasiya uçuşları təşkil etdik”, – deyə U.Peters qeyd edib.

O həmçinin bildirib ki, evinə qayıtmaq istəyən Yeni Kaledoniya sakinləri də eyni reyslərlə Numeaya göndərilib.

Məlumat üçün əlavə edək ki, Fransanın nəzarəti altında olan və Sakit okeanda yerləşən adıçəkilən adada Parisin müstəmləkəçilik siyasətindən narazı olan yerli xalq özünün hüquqları ilə bağlı etiraz aksiyaları keçirir. Artıq üç həftəyə yaxın davam edən aksiyalarda 10-a yaxın etirazçı öldürülüb.