Zaporojye AES-də təhlükəli anlar | Partlayışa görə təcili tədbir görüldü

Ukrayna Silahlı Qüvvələrinin Enerqodar şəhərinə hücumu nəticəsində Zaporojye Atom Elektrik Stansiyasının soyutma sistemləri yanıb.

Bu barədə Zaporojye vilayətinin “rəhbəri” Yevgeniy Balitski məlumat verib.

Onun sözlərinə görə, ərazidə Fövqəladə Hallar Nazirliyinin əməkdaşları işləyir və yanğın artıq lokallaşdırılıb.

“Atom Elektrik Stansiyasının və Enerqodar şəhərinin ətrafında radiasiya fonu normaldır. Stansiya rəhbərliyi ilə birlikdə vəziyyəti nəzarətdə saxlayırıq”, – deyə o, sosial media hesabında paylaşım edib.

Bu arada, Ukrayna Prezidenti Volodimir Zelenski məsələyə reaksiya verərək sözügedən hadisəyə görə Rusiyanı günahlandırıb. Rəsmi Moskva isə əksinə olaraq, Zaporojye Atom Elektrik Stansiyasına hücumu Ukraynanın növbəti təxribatı kimi qiymətləndirib.

Beynəlxalq Atom Enerjisi Agentliyi də Rusiya tərəfinin verdiyi bəyanata istinad edərək məsələyə münasibət bildirib.

“Zaparojye AES-də baş verən çoxsaylı partlayışlardan sonra ərazidə güclü tünd tüstünün havaya qalxdığını müşahidə etdik. Bu hadisədən sonra soyutma qüllələrindən birinə pilotsuz təyyarənin hücum etdiyi qənaətinə gəldik”, – deyə paylaşımda qeyd olunub.