Zaxarova Ermənistanın Beynəlxalq Cinayət Məhkəməsi ilə əməkdaşlığından danışdı

“İrəvanın Beynəlxalq Cinayət Məhkəməsinin Roma statutunda iştirakı Haaqa tribunalının bir sıra rusiyalı vəzifəli şəxslərin həbsinə order verməsi fonunda Rusiya-Ermənistan münasibətlərinə birbaşa zərər vurur. Bu, simvolik deyil, olduqca praktiki zərərdir”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova dekabrın 4-də keçirdiyi brifinqdə “NEWS.ru”nun sualını cavablandırarkən deyib.

“Əgər Ermənistanın BCM ilə əməkdaşlığı, həqiqətən də, hansısa beynəlxalq normaların tətbiqinə yardım etsəydi, yəqin ki, bunu başa düşmək, alqışlamaq olardı. Lakin bu “psevdo məhkəmə”nin iki onillik iş təcrübəsi bunun əksindən xəbər verir.

Bu orqanın həll etməyə çalışdığı problemlərin heç biri həllini tapmayıb. Dəstək və əməkdaşlığa dair bəyanatlar sadəcə olaraq bu qondarma məhkəməni yeni avantüralara sövq edir”, – deyə M.Zaxarova bildirib.

O qeyd edib ki, Moskvanın Beynəlxalq Cinayət Məhkəməsi ilə bağlı mövqeyi çoxdan müəyyən edilib:

“BCM effektiv fəaliyyət göstərmək iqtidarında deyil, düzgün təşkil olunmayıb, bəyan edilmiş funksiyalarını yerinə yetirmir və iddia etdiyi vəzifələri həll etmək səlahiyyətinə malik deyil. Uzun illər öncə verdiyimiz proqnoz özünü doğruldub. Mənə elə gəlir ki, bu qurum bilərəkdən əsassız iddialara hüquqi don geyindirə bilmək üçün yaradılıb”.