Zelenski Almaniyada NATO rəhbərləri ilə danışıqlar aparıb - Baku TV

Volodimir Zelenski Almaniyada keçirilən Münxen Təhlükəsizlik Konfransında NATO-nun Baş katibi Mark Rütte ilə görüşüb.

Görüşdə Ukraynaya hərbi dəstək məsələsi müzakirə olunub.

V.Zelenski bildirib ki, görüş zamanı Ukraynanın Hava Hücumundan Müdafiə sistemləri üçün raketlərin tədarükünə yönəlmiş təşəbbüsün maliyyələşdirilməsi məsələsi dəyərləndirilib.

O, Ukraynanın müdafiə qabiliyyətini gücləndirmək üçün beynəlxalq əməkdaşlığın vacibliyini vurğulayıb və tərəfdaş ölkələrin töhfələrindən məmnunluğunu ifadə edib.

Görüşdə həmçinin Avropada birgə müdafiə təşəbbüsləri və Ukraynanın mülki əhalinin həyatını qorumaq imkanlarının artırılması məsələləri də müzakirə olunub.

V.Zelenski vurğulayıb ki, Ukrayna Müdafiə Əlaqə Qrupunun iclasında tərəfdaş ölkələr Ukrayna üçün 38 milyard avro məbləğində hərbi yardım paketini təsdiqləyib və bunu mühüm inkişaf kimi qiymətləndirib.

Qeyd edək ki, NATO-nun Avropa ölkələri tərəfindən maliyyələşdirilən proqram çərçivəsində ABŞ 2026-cı ildə Ukraynaya ümumi dəyəri təxminən 15 milyard dollar olan silah istehsalı və tədarükü edəcək.

Bu barədə NATO-nun Baş katibi Mark Rütte bildirib.

"Amerika tərəfi Ukraynaya təchizatı dayandırmayıb. ABŞ tədarük etməyə hazırdır. Bunu fasiləsiz və maneəsiz edir", – deyə M.Rütte qeyd edib.

NATO-nun Baş katibi bildirib ki, Alyans hər ay Ukraynaya təxminən bir milyard avro yardım göndərir. Bu il isə təxminən 15 milyard dollar dəyərində kritik silah və avadanlıqlar, o cümlədən raketlər və Hava Hücumundan Müdafiə sistemləri göndəriləcək.