Zelenski Qərbin dondurduğu 50 milyardın taleyindən danışıb

Son vaxtlar Qərbin, xüsusilə ABŞ-nin verdiyi vədlərə zidd olaraq Ukraynaya yardımları qəfil dayandırması ciddi qlobal qınağa və müzakirələrə səbəb olub. Xüsusilə Ukrayna ictimaiyyəti müharibənin ən həlledici anında ABŞ-nin bu gözlənilməz addımlarını və Vaşinqtonun məyusedici açıqlamalarını hiddət və narazılıqla qarşılayıb.

Rəsmi Kiyevdən bu duruma reaksiya da artıq verilib, ölkə rəhbəri yanvarın 12-də Kiyevdə Böyük Britaniya və Şimali İrlandiya Krallığının Baş naziri ilə birgə keçirdiyi mətbuat konfransında Ukrayna ictimaiyyətinin məsələ ilə bağlı narahatlığına münasibət bildirib.

Baku TV-nin Şərqi Avropa bürosunun məlumatına görə, Ukrayna Prezidenti Volodimir Zelenski fevralın 1-də xalqa bu istiqamətdə yeni nəticələrlə bağlı şad xəbər verəcəyini deyib.

“Artıq fevralın 1-də Avropa İttifaqından 50 milyard avroluq yardımın blokdan çıxarılması ilə bağlı müsbət cavab gözlənilir. 50 milyard avro məbləğində çoxmilyardlıq uzunmüddətli dəstəklə bağlı məhz fevralın 1-də müsbət qərarın verilməsi üçün çalışırıq. Əsl nəticəni fevralın 1-də sizinlə birlikdə görəcəyik. Bunun üzərində hər gün iş gedir. Vaşinqtondan dayanan yardıma gəlincə, düşünürəm ki, biz bununla bağlı da müsbət nəticəyə nail olacağıq”, – o bildirib.

V.Zelenski bu durumda hava hücumundan müdafiə ilə bağlı Ukraynanın mövcud gücünü də şərh edib:

“Hava hücumundan müdafiə sistemləri kontekstində dövlətimizin hərtərəfli müdafiəyə malik olduğunu söyləmək hələ tez olardı. Patriot sistemləri kifayət qədər deyil, yetəri qədər fərqli diapazonlu sistemlər yoxdur, lakin buna baxmayaraq, yavaş-yavaş onlar bizə gəlir. Nəsə əldə olunub. Biz tərəfdaşlarımızla bəzi məsələlərlə bağlı razılığa gəlmişik. Təfərrüatları açıqlamayacağam. Amma yaxşı nəticələr var”.