Zelenskinin doğulduğu şəhərə ağır zərbə | Zərərçəkənlər arasında azərbaycanlılar da var?

Yanvarın 17-si günün ikinci yarısında Ukraynanın Dnepropetrovsk vilayətinin Kirovoy-Roq şəhərinə Rusiya Ordusu tərəfindən ballistik raket zərbələri endirilib.

Hərbi məktəblər hədəfə alınsa da, zərbələr əraziyə yaxın evləri və mülki obyektləri də dağıdıb. Ölənlər və xəsarət alanlar var.

Ukrayna Fövqəladə Hallar Xidmətinin Dnepropetrovsk vilayəti üzrə rəsmisi, polkovnik-leytenant Sergey Kovronyuk Baku TV-nin Şərqi Avropa bürosuna hücumun nəticələri barədə məlumat verib.

“Bütün Dnepropetrovsk sakinləri bu zərbələrin təsirini hiss etdilər. Bu, şəhərə müharibə ərzində ilk belə irihəcmli ballistik hücum idi. Nəticədə hazırkı məlumata görə, 4 nəfər həlak olub.

Onlardan 3-ü qadın, 1-i kişidir. 7 yaralı var ki, onlardan 3-ü ağır vəziyyətdədir. İtkin düşənlər də var, sayları dəqiqləşdirilir. Dağıntılar arasında axtarış gedir. Hücum nəticəsində 2 çoxmərtəbəli bina dağılıb. Bir dördmərtəbəli təhsil obyekti ciddi zərər görüb”, – o bildirib.

Zərbələr nəticəsində bu şəhərdə yaşayan azərbaycanlılar da zərər görüb. Evləri və obyektləri dağılan həmyerlilərimiz var.

Kirovoy-Roqdakı azərbaycanlılar Konqresinin sədri Rəmzi Rzayev Baku TV-yə bildirib ki, ölən və yaralılar arasında azərbaycanlı yoxdur.