Zirvəni fərh etmək istəyən alpinistlər hansı şərtə əməl etməlidir?

Everest zirvəsini fəth etməyə çalışan alpinistlər artıq 2-ci baza düşərgəsindən, daha dəqiq, 6400-6750 metr yuxarıdakı ərazilərdən ən azı 2 kiloqram zibili özləri ilə geri gətirməli olacaqlar.

Nepal hakimiyyəti tərəfindən tətbiq edilən bu yeni qayda dünyanın ən yüksək zirvəsində tullantıların idarə olunmasını sərtləşdirmək məqsədi daşıyır.

Saqarmatxa Çirklənməyə Nəzarət Komitəsindən bildirilib ki, alpinistlər ekspedisiya bitdikdən sonra baza düşərgəsinə onsuz da 8 kiloqram zibil təhvil verməli idilər. İndi isə buna əlavə olaraq, zirvəyə yaxın ekstremal yüksəkliklərdən də 2 kiloqram tullantı toplanmalıdır.

2-ci düşərgədəki Saqarmatxa Çirklənməyə Nəzarət Komitəsinin əməkdaşları bu qaydaya əməl olunmasına şəxsən nəzarət edəcəklər.

Komitənin baş direktoru Tserinq Şerpa həmçinin elan edib ki, bu mövsümdən etibarən alpinistlərin şəxsi ekskrement (nəcis) torbalarından istifadə etməsi qadağan olunur. Onlar Saqarmatxa Çirklənməyə Nəzarət Komitəsi və yerli bələdiyyə tərəfindən verilən xüsusi torbalardan istifadə etməlidirlər.

Bu tədbirin məqsədi alpinistlərin dağda tullantı torbaları qoyub getməsinin qarşısını almaqdır.

Tserinq Şerpa əlavə edib ki, verilən məcburi torbalar qeydiyyata alınacaq və alpinistlər geri qayıtdıqda həmin torbalar mütləq geri təhvil verilməlidir.