39 yaşlı evli kişinin qətlinə sevgilisi səbəb olub? | Yevlaxda dəhşətli hadisə

Yevlaxda qətl törədilib. 43 yaşlı kişi avtomobili ilə özündən 4 yaş kiçik həmyerlisinin üzərindən keçib.

“İşdən gəlirdim, yolda zəng etdilər ki, qardaşını öldürüblər. Onun başqa qadınla münasibəti var idi. Dəfələrlə dedik əl çək, ailəlidir. Dedi ki, mən Elvinsiz yaşaya bilmərəm. Qardaşım ondan ayrılmaq istəyəndə onu öldürməklə hədələyib”, – mərhumun bacısı Bahar Sərdarova qətllə bağlı danışarkən deyib.

Hadisə ilə bağlı rayon prokurorluğu da məlumat yayıb.

Bildirilib ki, sentyabrın 21-də saat 19 radələrində Yevlax rayonu ərazisində 1985-ci il təvəllüdlü Elvin İbrahimovun ölməsi barədə rayon prokurorluğuna məlumat daxil olub.

Araşdırma zamanı 1981-ci il təvəllüdlü Zamin Cavadovun Yevlax şəhəri Nizami prospekti ərazisində şəxsi münasibətlər zəminində Elvin İbrahimovu avtomobillə vurması, daha sonra həmin avtomobillə sonuncunun üzərindən keçməklə qəsdən öldürməsinə əsaslı şübhələr müəyyən edilib.

Faktla bağlı Yevlax rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Z.Cavadov iş üzrə şübhəli şəxs qismində tutulub.

Qeyd edək ki, Elvin İbrahimov Yevlaxda taksi fəaliyyəti ilə məşğul olub. Onun iki övladı var.