Abşeronda bədbəxt hadisə | Karxanadakı faciə ilə bağlı qurumdan açıqlama - Baku TV

Abşeron rayonunun Daş Güzdək qəsəbəsində yerləşən daş karxanalarından birində ölüm hadisəsi baş verib.

Hadisə zamanı 65 yaşlı Rabil Zərbəliyevin ayağı daş karxanasında istifadə olunan qurğuya düşüb.

Ağır xəsarət alan işçi xəstəxanaya aparılarkən yolda həyatını itirib.

Baku TV əməkdaşının ərazidən hazırladığı reportaj zamanı daş karxanalarında iş şəraiti ilə bağlı ciddi problemlər də müşahidə olunub.

Ərazidə köhnə və istismar müddətini başa vurduğu ehtimal edilən qurğulardan istifadə edildiyi, bəzi elektrik naqillərinin isə açıq vəziyyətdə olduğu bildirilib.

Reportaj zamanı işçilərin istirahət etdiyi və qidalandığı şəraitin də qənaətbəxş olmadığı müşahidə edilib.

Həmçinin qeyd edilib ki, belə müəssisələrdə çalışan şəxslərin əmək müqaviləsi olmadan işlədilməsi ilə bağlı da suallar yaranır. Bu isə işçilərin təhlükəsizliyi ilə yanaşı, bədbəxt hadisə zamanı məsuliyyət məsələsini də gündəmə gətirir.

Hadisə ilə bağlı Dövlət Əmək Müfəttişliyi Xidmətindən bildirilib ki, qurum Abşeron rayonunun Daş Güzdək qəsəbəsində yerləşən karxanada 1961-ci il təvəllüdlü Rabil Əsgər oğlu Zərbəliyevin iş zamanı xəsarət alması və nəticədə, həyatını itirməsi barədə məlumatlıdır:

“Hazırda qeyd olunan hadisə ilə bağlı Dövlət Əmək Müfəttişliyi Xidmətində araşdırma aparılır. Araşdırmanın nəticəsi barədə əlavə məlumat veriləcək”.