Ağac yaşayış binasının üstünə aşdı | Qurum bu vəziyyətlə bağlı nəyi açıqladı? - Baku TV

Paytaxtın Nizami rayonu, Qara Qarayev küçəsində güclü külək təhlükəli vəziyyətdə olan ağacın iri budağını qırıb. Budaq beşmərtəbəli binanın sonuncu mərtəbəsində yerləşən mənzilin eyvanının üzərinə düşərək ona ziyan vurub.

Hadisənin baş verməsindən saatlar keçməsinə baxmayaraq, sakinlərin sözlərinə görə, aidiyyəti qurumlar tərəfindən hələ də hər hansı tədbir görülməyib.

“Üç dəfə zəng etmişik. Hər dəfə “indi gəlirik” deyirlər, amma hələ gələn yoxdur. Hadisə səhər saat 9-10 radələrində baş verib. İcra hakimiyyəti məsuliyyəti Yaşıllaşdırma Təsərrüfatı Birliyinin, həmin qurum isə başqa idarələrin üzərinə atır. Ərazidəki ağacların hamısı təhlükə mənbəyidir”, – deyə sakinlərdən biri bildirib.

Digər sakin isə köhnə və təhlükəli ağaclara vaxtında qulluq edilməsinin vacibliyini vurğulayıb:

“Köhnə ağaclara baxmaq, təhlükəli budaqları vaxtında kəsmək lazımdır. Biz yaşlılar bir yana, bura əsas uşaqlar üçün təhlükəlidir. Yarım saatlıq işdir, amma gəlib görən yoxdur”.