Astarada dəhşətli hadisə | FHN itkin düşən iki balıqçının axtarışında - Baku TV

Dekabrın 9-u səhər saat 8 radələrində Astara rayonunun Şahağac kənd sakinləri – 28 yaşlı Turan Həsənov və 26 yaşlı Ağadədə Həsənov balıq tutmaq məqsədilə evdən çıxıblar.

Axşam saat 6-da geri dönməli olan balıqçılardan hələ ki xəbər yoxdur.

"Saat 2-də bizimlə əlaqə saxlayıblar, amma mühərrikin səsindən nə dediklərini eşidə bilməmişik. Saat 4-də yanacaqlarının qurtardığını ehtimal edib qayıq göndərdik. Sahil Mühafizə Xidmətinə də məlumat verdik, onlarla birlikdə dayanmadan axtarışlar apardıq. Səhərə qədər axtarışlar davam edib. Uşaqların burada batma ehtimalı yoxdur. Ola bilsin ki, yanacaqları bitib və ya mühərrik nasaz olub. Helikopter olmadan onları xilas etmək mümkün deyil. Ehtimal var ki, uşaqlar 200-250 metr dərinlikdədirlər. Ağadədənin üç gündür uşağı dünyaya gəlib. Turan isə yeni evlənib", – itkin düşən Ağadədə Həsənovun əmisi bildirib.

Dərhal əraziyə Fövqəladə Hallar Nazirliyinin və Dövlət Sərhəd Xidmətinin Sahil Mühafizə Hissəsinin xilasediciləri cəlb olunub.

Məsələ ilə bağlı Fövqəladə Hallar Nazirliyindən bildirilib ki, qurumun Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunub və aidiyyəti qurumlar məlumatlandırılıb. Hazırda itkin düşdüyü ehtimal olunan şəxslərin axtarışları davam etdirilir.