Astarada dəhşətli yol qəzası baş verdi | Ölənlər var

Astarada dəhşətli yol qəzası baş verib.

Bir ailənin 3 üzvü avtomobildə yanaraq ölüb. Ölənlər arasında ailənin 3 yaşlı qız uşağı da var.

Dəhşətli qəza axşam saatlarında Ələt-Astara-İran avtomobil yolunun 201-ci kilometrliyində Astaranın Ərçivan kəndi ərazisindən keçən hissəsində qeydə alınıb.

Astara rayon Şiyəkəran kənd sakini 31 yaşlı Mirzəmməd Əliyevin idarə etdiyi avtomobil idarəetməni itirərək yol kənarında hərəkətsiz dayanan Rusiya vətəndaşı 56 yaşlı Maqamed Abdullaşa məxsus iritonnajlı yük avtomobili ilə toqquşub. Zərbənin təsirindən minik avtomobili alışaraq yanıb.

Qəza səbəbindən sürücü Mirzəmməd Əliyev, onun həyat yoldaşı 22 yaşlı Fərqanə Əliyeva və onların 3 yaşlı qızı Gülxanım avtomobildə yanaraq ölüblər.

Dərhal hadisə yerinə Fövqəladə Hallar Nazirliyinin 2 yanğınsöndürən avtomobili və canlı qüvvəsi, Cənub Regional Mərkəzinin xilasetmə qrupunun 2 briqadası cəlb olunub. Yanan avtomobil söndürülüb. Meyitlər nəqliyyat vasitəsindən çıxarılaraq aidiyyəti üzrə təhvil verilib.

Faktla bağlı araşdırma aparılır.