AZAL-ın təyyarəsinin düşdüyü qəza barədə açıqlama

Birinci vitse-prezident Mehriban Əliyeva Aktau şəhərində baş verən təyyarə qəzası ilə bağlı paylaşım edib.

Paylaşımda deyilir: “Aktau yaxınlığında təyyarə qəzası nəticəsində insanların faciəli şəkildə həlak olması xəbəri məni dərindən sarsıtdı. Həlak olanların doğmalarına və yaxınlarına dərin hüznlə başsağlığı verir, onlara güc və səbir diləyirəm. Yaralananların tezliklə şəfa tapmasını arzulayıram. Uca Allah xalqımızı bütün bəlalardan və bədbəxtliklərdən qorusun!”.

Bu arada, Çeçenistan rəhbəri Ramzan Kadırov da qəza ilə bağlı başsağlığı verib. Bu barədə R.Kadırov “Telegram” kanalında yazıb.

“Bakıdan Qroznıya uçan “Azərbaycan Hava Yolları” aviaşirkətinin Aktauda qəzaya uğrayan sərnişin təyyarəsinin həlak olan sərnişinlərinin yaxınlarına başsağlığı verirəm”, – deyə Çeçenistan rəhbəri qeyd edib.

Həmçinin AZAL-ın Aktauda qəzaya uğrayan təyyarəsində 37 Azərbaycan vətəndaşının olduğu məlum olub. Bu barədə “Report” məlumat yayıb. İlkin məlumata görə, təyyarədə 37 Azərbaycan, 6 Qazaxıstan, 3 Qırğızıstan, 16 Rusiya vətəndaşı olub.