AZAL təyyarəsi Rusiyaya niyə endi? - 155 sərnişin...

"AZAL təyyarəsi geri qayıdaraq Sankt-Peterburq hava limanına enməli olub. Eniş uğurla həyata keçirilib, xəsarət alan yoxdur".

Bu barədə "Azərbaycan Hava Yolları" aviaşirkətinin mətbuat xidməti məlumat yayıb.

Məlumatda bildirilir ki, AZAL aviaşirkətinə məxsus "Airbus A320" təyyarəsi Sankt-Peterburq–Bakı marşrutu üzrə uçuş edərkən təyyarədə texniki nasazlıq yaranıb. Bu zaman hava gəmisinin kapitanı uçuş təhlükəsizliyini təmin etmək məqsədilə geri qayıdaraq Pulkovo Hava Limanına eniş etməyə qərar verib.

"Bütün təhlükəsizlik prosedurlarına uyğun olaraq, ekipaj enişdən əvvəl yanacağın müəyyən hissəsini sərf etməklə lazımi tədbirləri yerinə yetirib. Təyinat üzrə müəyyən edilmiş qaydalara əsasən, Sankt-Peterburq hava limanında fövqəladə və xilasetmə xidmətləri yüksək hazırlıq vəziyyətinə gətirilib. Təyyarə Bakı vaxtı ilə saat 04:43-də Pulkovo Hava Limanına uğurla enib. Eniş zamanı hava gəmisi uçuş-enmə zolağından cüzi kənara çıxıb. Göyərtədə olan 155 sərnişin operativ şəkildə təxliyə olunub. Xəsarət alan yoxdur.

Sankt-Peterburqdan Bakıya sərnişinlərin daşınması üçün artıq digər AZAL təyyarəsi göndərilib. AZAL sərnişinlərə göstərdikləri təmkin və anlayış üçün təşəkkürünü bildirir, Pulkovo Hava Limanının xidmətlərinə peşəkar və koordinasiyalı fəaliyyətlərinə görə minnətdarlığını ifadə edir", ‒ deyə məlumatda qeyd edilir.