Bakı-Quba yolunda dəhşətli qəza | Yaralananlar haqqında son məlumat

Bakı-Quba yolunda yol-nəqliyyat hadisəsi baş verib. Hadisə yolun 140-cı kilometrliyində qeydə alınıb.

Belə ki, qadın sürücünün idarə etdiyi “KIA Sportage” markalı minik avtomobili yoldan çıxaraq aşıb.

Hadisə nəticəsində maşında olan 7 nəfər xəsarət alıb. Yaralılar dərhal Sumqayıt Tibb Mərkəzinin nəzdindəki tibb müəssisələrinə hospitalizasiya olunublar.

Mərkəzdən verilən məlumata görə, Təcili Tibbi Yardım Xəstəxanasına 3 nəfər (cinsi qadın) yerləşdirilib. Onlardan 1998-ci il təvəllüdlü şəxs L1 fəqərəsinin sınığı və aşağı ətrafların parezi, 1984-cü il təvəllüdlü şəxs isə sol bud-çanaq oynağının çıxığı, sağ oturaq və qasıq sümüklərinin sınığı diaqnozları ilə Reanimasiya şöbəsinə yerləşdiriliblər. Hazırda vəziyyətləri ağır qiymətləndirilir.

“Sağ gözətrafı dərialtı hematoma, qapalı kəllə-beyin travması və baş-beyin silkələnməsi diaqnozu qoyulan başqa bir şəxs isə Təcili tibbi yardım şöbəsinə yerləşdirilib və müşahidə altındadır. Vəziyyəti orta ağır olaraq qiymətləndirilir. Uşaq xəstəxanasına isə 4 nəfər (2 nəfər cinsi kişi, 2 nəfət cinsi qadın) hospitalizasiya olunub. Onlardan 2009-cu il təvəllüdlü kişi (bud sümüyünün sınığı diaqnozu ilə) Reanimasiya şöbəsinə yerləşdirilib və vəziyyəti ağır qiymətləndirilir.

Digər 3 nəfərin (2009, 2010 və 2017-ci il təvəllüdlü) bədənlərinin müxtəlif nahiyələrində sıyrıntılar və əziklər təyin edilib. Onların müalicəsi Təcili tibbi yardım şöbəsində davam etdirilir.

Vəziyyətləri orta ağırdır”, – məlumatda qeyd olunub.