Bakıda taksi sürücüsü onu sorğu-suala tutan adamı belə qətlə yetirdi

“Yola verirsən məni?” ifadəsinə görə küçədə tanımadığı adamı öldürən şəxsin məhkəməsi yekunlaşıb.

Xətai Rayon Prokurorluğunda 2023-cü il avqustun 6-da Məzahir Rüstəmov küçəsi, 14 ünvanında bıçaqlanma hadisəsi ilə bağlı araşdırma başlanılıb.

Taksi sürücüsü işləyən, şərti adı Azad Quliyev olan şəxs köşkün qarşısında ona bir nəfərin yaxınlaşaraq söhbət etməyə başladığını bildirib. Sonuncu ona Balaxanı qəsəbəsində yaşadığını deyib, orada yaşayan müxtəlif şəxslərin adlarını çəkərək onları tanıyıb-tanımadığını soruşub.

Azad Quliyev adları çəkilən adamları tanımadığını söyləyərək söhbətdən yayınmağa çalışdıqda şərti adı Aleksandr Kirilov olan şəxs əsəbiləşərək nəyə görə sözlərini ciddi qəbul etmədiyini söyləyib.

Ünvanına nalayiq ifadələr səsləndirən Aleksandr Kirilovdan qisas almaqdan ötrü yaşadığı mənzilə gedən Azad Quliyev mətbəxdən bıçağı götürüb və geri qayıdaraq şəxsin sol ayağına zərbə endirib. Sonra bıçağı yaşadığı binanın yaxınlığında yerə atıb və evinə qayıdıb.

Bir neçə saatdan sonra gələn polis əməkdaşları yaralını xəstəxanaya çatdırsalar da, sol budun arteriyasının zədələnməsi nəticəsində baş verən kəskin qanitirmə səbəbindən öldüyünü bildiriblər. Aparılan analizlərin nəticəsində onun qanında etil spirti aşkar edilib.

Təqsirləndirilən şəxs onu öldürmək məqsədi olmadığını, sadəcə işlətdiyi nalayiq sözlərə görə üzr istəməsi üçün qorxutduğunu bildirib.

Bakı Ağır Cinayətlər Məhkəməsinin hökmü ilə Azad Quliyev 9 il müddətinə azadlıqdan məhrum olunub. Bakı Apellyasiya Məhkəməsinin qərarı ilə isə hökm dəyişdirilərək 10 il cəza ilə əvəzlənib.