Balakəndə qısqanclıq cinayətə səbəb oldu - Baku TV

Balakəndə kişi arvadını və bacanağını bıçaqlayıb.

“Lent.az”ın verdiyi məlumata görə, hadisə rayonun Qaysa kəndində qeydə alınıb.

38 yaşlı Kamal Məmmədov yaşadığı evin həyətində bacanağına, evin qonaq otağında isə arvadına kəsici alətlə xəsarətlər yetirib.

Bu əməllərinə görə, o saxlanılıb və barəsində cinayət işi başlanıb. İttiham aktına görə, bacanağı onun evinin həyətindəki tikilidə gizlənib və "WhatsApp" vasitəsilə Kamalın arvadına mesaj yazaraq həyətə düşməsini istəyib.

Bundan xəbər tutan Kamal Məmmədov qısqanclıq zəminində həyətdə bacanağını bıçaqlayıb. Daha sonra evə girərək qonaq otağında arvadına da xəsarət yetirib.

Təqsirləndirilən şəxs məhkəmə çıxışı zamanı barəsində “Konstitusiya və Suverenlik İli” çərçivəsində elan olunmuş amnistiya aktının tətbiq olunmasını xahiş edib.

Balakən Rayon Məhkəməsinin qərarı ilə Kamal Məmmədov barəsində cinayət təqibinə xitam verilib və o, məsuliyyətdən azad olunub.