Biləsuvarda qandonduran hadisə | Planlı əməliyyat faciə ilə nəticələndi

Biləsuvar rayonunun Xırmandalı kəndində yaşayan ailənin kiçik övladı – 3 yaşlı Uğur Hacızadə planlı əməliyyata hazırlaşdığı gün həyatını itirib.

Uşağın gözlənilməz ölümü yaxınları arasında dərin sarsıntı yaradıb.

Anası Aydan Hacıyeva hadisəni belə şərh edib: “Məni mətbəxə salıb qapını bağladılar. Çöldə nə baş verdiyini bilmədim. Çıxanda həkim axtardım, tapmadım. İndi də ortalıqda yoxdurlar. Narkozu çox vurub övladımın ürəyini partlatdılar”.

Uğurun nənəsi Hökümə Hacıyevanın sözlərinə görə, nəvəsi sadəcə yırtıq diaqnozu ilə xəstəxanaya aparılıb və vəziyyəti normal olub: “Həkim bizə dedi ki, heç bir problemi yoxdur, sabah gətirərsiniz, əməliyyat edərik. Sonrakı gün uşağa iynə vurulub. 3-4 saat keçdi, xəbər gəlmədi deyə təşvişə düşdük. Daha sonra babasını çağırdılar ki, uşaq ayılmır. Əməliyyat olunmayıb, iynədən şoka düşüb”.

Rəsmi məlumata görə, azyaşlı sol qasıq nahiyəsində yaranan ağrılar səbəbi ilə Biləsuvar Rayon Mərkəzi Xəstəxanasına gətirilib. Onun planlı əməliyyatı üçün hazırlıq işlərinə başlanılıb. Əməliyyat günü saat 15:00 radələrində uşağa anestezioloji preparatlar inyeksiya olunduğu zaman anafilaktik şok baş verib.

Hazırda faktla bağlı müvafiq araşdırma aparılır. Ölüm səbəblərinin tam dəqiqləşdirilməsi üçün məhkəmə-tibbi ekspertiza təyin olunub.