Binədə qohumlar arasında qan töküldü | Tükürpərdən hadisənin detalları

2021-ci il dekabrın 10-da Binə qəsəbəsinin Hövsan südçülük sovxozunda Allahverdi Mirzəyevin yaşadığı evin həyətində odlu silahla öldürülməsi barədə Suraxanı Rayon Prokurorluğuna məlumat daxil olub.

Araşdırma zamanı məlum olub ki, Tariyel Qurbanov şəxsi münasibətlər zəminində qisas almaq məqsədilə yeznəsi Allahverdi Mirzəyevə ov tüfəngindən atəş açaraq onu qətlə yetirib.

Şübhəli şəxs qismində saxlanılan 1978-ci il təvəllüdlü, Bakı şəhər sakini Tariyel Qurbanov törətdiyi cinayəti etiraf edib.

Suraxanı Rayon Prokurorluğunda Cinayət Məcəlləsinin qəsdən adamöldürmə maddəsi ilə cinayət işi açılıb. İstintaq zamanı müəyyən edilib ki, Tariyel Qurbanov yeznəsi Allahverdi Mirzəyevi bacısı Təranə Mirzəyevaya xəyanət etməsi, pullarını başqa qadına xərcləməsi, ailələrində mütəmadi mübahisələrin baş verməsi səbəbindən qisas almaq məqsədilə öldürmək qərarına gəlib.

2021-ci il dekabrın 10-u axşam saat 19:00 radələrində Tariyel Qurbanov 16 kalibrli ov tüfəngini götürərək bacısının evinə yollanıb. O, ailə üzvlərindən xəbərsiz həyətdə gizlənərək yeznəsinin evə qayıtmasını gözləyib. Allahverdi Mirzəyevin həyətə daxil olduğunu görən kimi qaynı Tariyel Qurbanov tüfəngin lüləsini mərhumun çənəsinə tuşlayaraq bir dəfə atəş açıb.

Hadisə nəticəsində Allahverdi Mirzəyev aldığı güllə yarasından yerindəcə dünyasını dəyişib.

Bakı Ağır Cinayətlər Məhkəməsinin hökmü ilə Tariyel Qurbanov cəzasını ciddi rejimli cəzaçəkmə müəssisəsində çəkməklə 11 il 6 ay müddətinə azadlıqdan məhrum edilib.