Binəqədidəki binada baş verən qorxulu yanğınla bağlı açıqlama | Səbəb isə... - Baku TV

Binəqədi rayonu, 6-cı mikrorayon, köhnə 27 saylı poliklinikanın qarşısında yerləşən taxta konstruksiyalı tikilidə yanğın baş verib.

Hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin qüvvələri, təcili tibbi yardım briqadası və polis əməkdaşları cəlb olunub. Yanğının yaxınlıqdakı evlərə, digər obyektlərə və yaşayış binasına keçməsinin qarşısı alınıb.

FHN-in məlumatına görə, İsrafil Həşimov küçəsində baş verən yanğın təxminən 1000 kvadratmetr ərazini əhatə edən sahənin 400 kvadratmetrində qeydə alınıb. Yanğınsöndürənlərin çevik müdaxiləsi nəticəsində yanğın söndürülüb. Ərazidə bəzi tüstülənmələr müşahidə olunsa da, söndürmə işləri başa çatıb.

Hadisə zamanı yanğınsöndürənlərdən yüngül xəsarətalanlar olub, vətəndaşlar arasında xəsarətalan qeydə alınmayıb.

Qeyd edək ki, təxminən 10 il əvvəl fəaliyyətini dayandıran köhnə poliklinika 9 saylı şəhər poliklinikasına birləşdirilib. Sakinlərin sözlərinə görə, uzun müddət boş qalan ərazidən narkotik istifadəçiləri istifadə edib və bununla bağlı aidiyyəti qurumlara dəfələrlə müraciətlər olunub.